لاہور: (آواز نیوز) نیوزی لینڈ کے فاسٹ باؤلر لوکی فرگوسن بھی آئی سی سی چیمپئنز ٹرافی سے باہر ہو گئے۔فرگوسن کو وارم اپ میچ کے دوران پیر میں تکلیف ہوئی تھی۔اس حوالے سے نیوزی لینڈ کرکٹ کا کہنا ہے کہ میڈیکل پینل نے طے کیا ہے کہ فرگوسن چیمپئنز ٹرافی کے لیے فٹ نہیں ہو پائیں گے، نیوزی لینڈ کے سکواڈ میں لوکی فرگوسن کی جگہ کائل جیمیسن کو شامل کر لیا گیا ہے۔واضح رہے کہ کچھ روز قبل نیوزی لینڈ کے فاسٹ باؤلر بین سیئرز آئی سی سی چیمپئنز ٹرافی ٹورنامنٹ سے باہر ہو گئے تھے۔نیوزی لینڈ کرکٹ کے مطابق بین سیئرز ہیمسٹرنگ انجری کے باعث ٹورنامنٹ سے باہر ہوئے ہیں، انہیں بدھ کو کراچی میں ٹریننگ سیشن کے دوران انجری ہوئی تھی۔یاد رہے کہ پاکستان کے صائم ایوب اور بھارت کے جسپریت بمراہ بھی انجری کے باعث ایونٹ سے باہر ہو چکے ہیں جبکہ آسٹریلیا کے فاسٹ باؤلر مچل سٹارک ذاتی وجوہ کی بنا پر میگا ایونٹ سے باہر ہوئے ہیں۔افغان سپنر اے ایم غضنفر بھی فٹنس مسائل کی وجہ سے ٹیم کو دستیاب نہیں ہوں گے جبکہ جنوبی افریقا کو فاسٹ باؤلر اینرک نورکیا کی خدمات حاصل نہیں ہوں گی۔
