اوسلو: (ویب ڈیسک) امریکی صدر ڈونلڈ ٹرمپ، پوپ فرانسس اور کئی دیگر عالمی شخصیات کو نوبیل امن انعام کیلئے نامزد کرلیا گیا۔میڈیا رپورٹ کے مطابق نوبیل انسٹیٹیوٹ نے بتایا کہ 2025ء کے لئے 338 امیدوار سامنے آئے ہیں جن میں 244 افراد اور 94 تنظیمیں شامل ہیں، نوبیل قوانین کے مطابق نامزد افراد کے نام 50 سال تک خفیہ رکھے جاتے ہیں لیکن کچھ نامزد کنندگان اپنے امیدواروں کے نام ظاہر کر سکتے ہیں۔رپورٹ میں بتایا گیا ہے کہ امریکی کانگریس کے رکن ڈیرل عیسیٰ نے اعلان کیا وہ ڈونلڈ ٹرمپ کو نوبیل انعام کے لئے نامزد کر رہے ہیں، ان کے مطابق ٹرمپ کی مشرق وسطیٰ میں امن کے لئے کی گئی کوششیں اس نامزدگی کی بنیاد ہیں، تاہم کچھ رپورٹس کے مطابق یہ نامزدگی ڈیڈ لائن کے بعد جمع کرائی گئی۔یوکرین کے رکن پارلیمنٹ اولیکسنڈر میرزکو نے بھی نومبر میں ٹرمپ کو نامزد کیا تھا تاکہ عالمی توجہ حاصل کی جا سکے، نامزد افراد میں نیٹو کے سابق سیکرٹری جنرل جینز اسٹولٹن برگ بھی شامل ہیں۔نوبیل کمیٹی ہمیشہ نامزد امیدواروں پر خاموشی اختیار کرتی ہے لیکن دنیا بھر کے کچھ قانون ساز، وزرا اور پروفیسرز اپنی نامزدگیوں کو ظاہر کر سکتے ہیں۔برطانیہ میں ہزاروں افراد نے ایک پٹیشن پر دستخط کئے جس میں ایک فرانسیسی خاتون گیسلے پیلیکوٹ کو نوبیل امن انعام دینے کا مطالبہ کیا گیا تھا، انہیں اپنے سابق شوہر کے خلاف عدالتی جنگ لڑنے پر پذیرائی ملی تھی، جسے اپنی بیوی پر تشدد اور دیگر سنگین جرائم پر سزا دی گئی تھی۔یہ واضح نہیں کہ ان شخصیات میں سے کون نوبیل امن انعام 2025ء جیتے گا لیکن ٹرمپ کی نامزدگی خاص طور پر توجہ حاصل کر رہی ہے، کیونکہ وہ عالمی سطح پر متنازعہ مگر اثرانداز شخصیت سمجھے جاتے ہیں۔
