دمشق: (ویب ڈیسک) شامی سکیورٹی فورسز نے فائرنگ کر کے معزول صدربشار الاسد کے 28 حامیوں کو ہلاک کر دیا۔غیر ملکی خبر رساں ایجنسی کے مطابق شام کے معزول صدر بشار الاسد کے حامی جنگجوؤں نے جمعرات کو صوبہ لطقیہ کے قصبے جبلہ میں حکومتی فورسز پر حملہ کیا۔صوبے کے سکیورٹی سربراہ لیفٹیننٹ کرنل مصطفیٰ نے بتایا کہ بشار الاسد کے حامیوں نے جبلہ اور آس پاس کے دیہی علاقوں میں سکیورٹی گشت اور چوکیوں کو نشانہ بنایا۔خبر رساں ایجنسی کے مطابق بشار الاسد کے حامیوں کے حملے میں 16 سکیورٹی اہلکار اور 4 عام شہری بھی ہلاک ہو گئے۔برطانیہ میں قائم ایک مبصر تنظیم نے بتایا کہ ہلاک ہونے والے زیادہ تر سکیورٹی اہلکار شمال مغربی شام کے شہر ادلب سے تعلق رکھتے تھے، جو ان باغیوں کا ایک گڑھ تھا جنہوں نے ملک کی 13 سالہ خانہ جنگی کے دوران اسد کے خلاف لڑائی لڑی۔تاہم جوابی کارروائی میں شامی سکیورٹی فورسز کے ہاتھوں معزول صدربشار الاسد کے 28 حامی مارے گئے، جھڑپوں کے بعد سکیورٹی فورسز نے کرفیو نافذ کرنےکا اعلان کیا۔شامی سکیورٹی حکام کا کہنا ہے کہ ہم خطے میں استحکام بحال کریں گے اور اپنے عوام کی جان اور املاک کا تحفظ کریں گے۔خیال رہے کہ گزشتہ برس دسمبر میں شام میں اپوزیشن فورسز نے ملک کے بڑے شہروں پر قبضہ کرتے ہوئے سابق صدر بشار الاسد کو ملک سے فرار ہونے پر مجبور کر دیا تھا جس کے بعد 5 دہائیوں سے زائد عرصے تک شام پر حکومت کرنے والے الاسد خاندان کے اقتدار کا سورج غروب ہوا، بشار الاسد اپنی فیملی کے ساتھ روس فرار ہو گئے تھے جہاں انہوں نے سیاسی پناہ لے لی ہے۔
