لاہور: (آواز نیوز) پاکستان شوبز انڈسٹری کی ابھرتی ہوئی اداکارہ سحر ہاشمی نے انکشاف کیا ہے کہ جب وہ کم عمر تھیں اور سکول میں پڑھتی تھیں تب انہیں خود سے زائد العمر شخص سے محبت ہوگئی تھی لیکن معاملہ آگے نہ بڑھ سکا۔خوبرو اداکارہ سحر ہاشمی نے حال ہی میں دنیا نیوز کے مزاحیہ پروگرام ’مذاق رات‘ میں بطور مہمان شرکت کی جہاں انہوں نے مختلف معاملات پر کھل کر بات کی۔پروگرام کے دوران انہوں نے بتایا کہ انہیں بچپن سے اداکاری کا شوق نہیں تھا لیکن بعد میں فلم اور ڈرامہ کی تعلیم حاصل کرنے کے بعد انہیں اداکاری کرنے کا شوق ہوا۔ان کے مطابق انہوں نے فلم اینڈ ڈرامہ میں گریجویشن کر رکھا ہے جب کہ انہیں سکرپٹ لکھنے نہیں بلکہ ہدایت کاری کا شوق تھا تاہم وہ اداکارہ بن گئیں۔انہوں نے بتایا کہ انہیں شوبز انڈسٹری میں آئے ہوئے ابھی محض دو سال سے بھی کم عرصہ ہوا ہے لیکن خوش قسمتی سے انہیں آتے ہی بڑے منصوبوں میں کام کرنے کا موقع ملا جس وجہ سے وہ مقبول ہو گئیں۔ایک سوال کے جواب میں سحر ہاشمی کا کہنا تھا کہ انہیں بچپن میں دلہن بننے کا شوق ہوتا تھا، وہ سوچتی تھیں کہ بڑی ہوکر دلہن بنیں گی، سرخ عروسی لباس پہنیں گی۔خوبصورتی سے متعلق سوال پر اداکارہ کا کہنا تھا کہ بچپن سے لے کر اب تک ہر کوئی ان کی خوبصورتی کی تعریفیں کرتا ہے لیکن بعض لوگ حسد بھی کرتے ہیں۔یک طرفہ محبت کے سوال پر سحر ہاشمی کا کہنا تھا کہ ایسی محبت تکلیف دہ ہوتی ہے، انسان کو یک طرفہ محبت نہیں کرنی چاہیے۔پروگرام میں بات کرتے ہوئے ان کا کہنا تھا کہ وہ زیادہ تر خود مختار عورت کے کردار ادا کرنا پسند کرتی ہیں اور ان کی خواہش ہے کہ ہمیشہ انہیں طاقتور اور خود مختار عورت کے کردار ہی دیئے جائیں۔
