ملتان: (آواز نیوز) پاکستان سپر لیگ 10 میں تین لگاتار میچ ہارنے کے بعد ملتان سلطانز چوتھا میچ اپنے ہوم گراؤنڈ ملتان میں آج لاہور قلندرز کی مضبوط ٹیم کے خلاف کھیلے گی۔دونوں ٹیموں کے درمیان میچ ملتان کرکٹ سٹیڈیم میں آج رات 8 بجے شروع ہوگا جہاں ملتان کی قیادت رضوان کے ہاتھوں میں ہو گی جبکہ قلندرز کو شاہین آفریدی لیڈ کریں گے۔ملتان کے کپتان محمد رضوان نے کہا ہے کہ ہمارے اگلے دونوں میچز ہمارے فینز کے سامنے ہیں یہ اچھی بات ہے لیکن ہمیں اچھی کرکٹ کھیلنی ہو گی، فیلڈنگ پر توجہ دینا ضروری ہے کیونکہ فیلڈنگ کی وجہ سے میچز ہمارے ہاتھ سے نکل رہے ہیں، فیلڈنگ پر قابو کرلیا تو ہمارا پورا ٹورنامنٹ اچھا ہوگا۔انہوں نے کہا ہے کہ اپنی فارم کے بارے میں یہی کہوں گا کہ جو دن گزرگیا وہ گزر گیا، ہر دن نیا ہوتا ہے لیکن میں اپنی پرفارمنس سے مطمئن ہوں۔
