سوشل میڈیا ایپ ٹک ٹاک پر ایک کروڑ سے زائد فالوورز رکھنے والی پاکستانی ٹک ٹاک اسٹار جنت مرزا اب فلموں میں انٹری کے لیے تیار ہیں۔ وہ پاکستان کے نامور ہدایت کار سید نور کی پنجابی فلم ’’تیرے باجرے دی راکھی‘‘ سے فلموں میں قدم رکھ رہی ہیں۔ فلم میں ان کے ساتھ پاکستان فلم انڈسٹری کے بڑے بڑے نام اداکارہ صائمہ، راشد محمود، مصطفیٰ قریشی، شفقت چیمہ، عرفان کھوسٹ، خوشبو اور بابر علی شامل ہیں۔فلم کا پوسٹر حال ہی میں ریلیز کیا گیا ہے اور یہ پوسٹر دیکھتے ہی دیکھتے سوشل میڈیا پر وائرل ہوگیا۔ فلم ’’باجرے دی راکھی‘‘ رواں برس عیدالفطرپرسینما کی زینت بنے گی۔جنت مرزا نے سوشل میڈیا پر اپنی فلم کو ملنے والے تنقیدی تبصروں پر کہا ہے کہ کسی کی حوصلہ شکنی کرنے کے بجائے لوگوں کی کوششوں کو سراہیں۔ ہم نے اس فلم میں بہت محنت کی ہے امید ہے آپ کو ہماری فلم پسند آئے گی۔
