کوئٹہ زرغون روڈ سرینا چوک پر واقع ہوٹل کی پارکنگ میں دھماکے سے تین افراد جاں بحق اور 12 افراد زخمی ہوگئے ہیں۔پولیس کا کہنا ہے کہ دھماکہ شدید نوعیت کا تھا،جس کی آواز دور دور تک سنی گئی۔ پولیس کے مطابق ہلاکتوں میں اضافے کا خدشہ ظاہر کیا جارہا ہے۔ ریسکیو عملے نے امدادی کارروائیاں شروع کردی ہیں، دھماکے کے بعد پارکنگ میں کھڑی متعدد گاڑیوں میں آگ لگ گئی ہے.چیئرمین سینیٹ محمد صادق سنجرانی نے کوئٹہ میں ہونے والے دھماکے کی شدید مذمت کر تے ہوئے کہا ہے کہ شر پسند اور ملک دشمن عناصر کبھی اپنے مقاصد میں کامیاب نہیں ہونگے۔ پوری قوم دہشت گردی کے خلاف متحد ہے۔ دہشت گرد ترقی کے عمل کو روکنا چاہتے ہیں جس میں وہ کبھی کامیاب نہیں ہونگے۔ غمزدہ خاندانوں کے غم میں برابر کے شریک ہیں۔ ملک دشمن قوتیں پاکستان اور خاص طور پر بلوچستان کی ترقی سےخائف ہیں، لیکن دہشت گردی کے واقعات ہمارا حوصلہ پست نہیں کر سکتے۔وفاقی وزیر داخلہ شیخ رشید احمد نے کوئٹہ کے سرینا ہوٹل میں دھماکے کے نتیجے میں ہونے والے قیمتی جانوں کے ضیاع پر رنج اور افسوس کا اظہار کرتے ہوئے چیف سیکرٹری بلوچستان سے واقعے کی رپورٹ طلب کرلی ہے۔ چینی سفیر بھی ہوٹل میں ٹہرے ہوئے تھے، تاہم دھماکے کے وقت وہ ہوٹل میں موجود نہیں تھے۔وزیر اعلی بلوچستان نے جان بحق افراد کے لواحقین سے تعزیت کرتے ہوئے سیکیورٹی فورسز کو فول پروف اقدامات کرنے کی ہدایت کردی ہے۔ سیکریٹری صحت ڈاکٹر ربابہ بلیدی کا کہنا ہے کہ دھماکے کے بعد اسپتالوں میں ایمرجنسی ناٖفذ کردی گئی ہے۔
